කුමන ප්‍රභේද ආවත් රටේ සෞඛ්‍ය පද්ධතියට ව්‍යසනය පාලනය කරගන්න හැකියාව තියෙනවා -සෞඛ්‍ය ඇමති

0 21

ගෝලීය කොවිඩ් ව්‍යසනය මධ්‍යයේ කුමන අළුත් ප්‍රභේද පැමිණියද මෙරට සෞඛ්‍ය පද්ධතියට එය පාලනය කරගතහැකි බව සෞඛ්‍ය අමාත්‍ය ආචාර්ය කෙහෙලිය රඹුක්වැල්ල මහතා පවසනවා.

ඇතැම් පිරිස් ඒ පිළිබඳ දුර්මත ගෙනගියද මෙරට සෞඛ්‍ය ක්ෂේත්‍රයට ඕනෑම තත්ත්වයකට මුහුණ දියහැකි ඉහළ ශක්තියක් පවතින බව අමාත්‍යවරයා පෙන්වා දෙන්නේ.

අමාත්‍ය කෙහෙළිය රඹුක්වැල්ල මහතා මේ බව කියා සිටියේ සෞඛ්‍ය අමාත්‍යාංශයේ පසුගිය 26 වනදා පැවති විශේෂ සාකච්ඡාවකදීයි. 

එහිදී වැඩිදුරටත් අදහස් දැක්වූ අමාත්‍යවරයා කියා සිටියේ නව ප්‍රභේදය සමඟ, ලෝක සංඛ්‍යා ලේඛන දෙස බලන විට යම් තිගැස්මකට ලක්වන බවත් එහෙත් මෙරට සෞඛ්‍ය සේවාව පිළිබඳව ඉහළ විශ්වාසයක් ජාත්‍යන්තරික වශයෙන් පවා පවතින බවයි. 

ඇතැමුන් රටෙහි සෞඛ්‍ය පද්ධතිය කඩා වැටෙන තත්ත්වයක පවතින බවට දුර්මත ගෙනයන බවද, එහෙත් එවැනි තත්ත්වයක් කිසිලෙසකින් ඇති නොවන්නට වගබලා ගන්නා බවද අමාත්‍යවරයා එහිදී පවසා තිබෙනවා.

විශේෂයෙන් රටෙහි සෞඛ්‍ය පද්ධතියට මේ උදෙසා හැකියාවක් පවතින බවත් එමෙන්ම එයට විශ්වාසයක්, ආත්ම ශක්තියක් පවතින්නේ පුහුණුවලත් රටට අවශ්‍ය සෞඛ්‍ය කාර්ය මණ්ඩලයක් රට තුළ සිටීම මෙන්ම ඔවුන්ගේ ප්‍රශංසනීය කැපවීම නිසා බවත් අමාත්‍යවරයා කියා සිටියා.

විශේෂයෙන් විශේෂඥ වෛද්‍යවරයාගේ සිට සෑම දෙනාගේම ඉහළ කැපකිරීම ව්‍යසනය පාලනයට ලැබුණු ඉහළ ශක්තියක් බවත් නව ප්‍රභේදයේ හැසිරීම කෙසේ වෙතත් එන්නත් මගින් වෛරසයේ ව්‍යාප්තිය හා මරණ ප්‍රමාණය අඩු කරගැනීමට හැකි වූ බවත් අමාත්‍යවරයා මෙහිදී පෙන්වා දී තිබෙනවා.

නිවෙස්ගත ප්‍රතිකාර ක්‍රමයවේදය රටතුළ ඉතා සාර්ථක වූ බවත් අවශ්‍ය තරම් ඇඳන්, ඔක්සිජන් නොමැති බවට ඇතැමුන් චෝදනා එල්ල කළත් රටෙහි පුරවැසියන්ට කිසිදු අවස්ථාවක අඩුපාඩුවක් නොවන අයුරින් රටේ සෞඛ්‍ය සේවාව උපරිමයෙන් ක්‍රියාවට නංවීමට හැකි බවත් අමාත්‍යවරයා මෙහිදී පැවසූවා.

රාජ්‍ය අමාත්‍යවරුන් වන විශේෂඥ වෛද්‍ය සුදර්ෂනී ප්‍රනාන්දුපුල්ලේ, මහාචාර්ය චන්න ජයසුමන යන මහත්ම මහත්මීන්ද මෙම අවස්ථාවට එක්ව සිටී අතර සෞඛ්‍ය අමාත්‍යාංශයේ ලේකම් මේජර් ජනරාල් වෛද්‍ය සංජීව මුණසිංහ, සෞඛ්‍ය අමාත්‍යාංශයට අයත් රාජ්‍ය අමාත්‍යාංශවල ලේකම්වරුන් හා සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන යන මහත්වරුන් මෙම අවස්ථාවට එක්ව තිබෙනවා. 

මෙයට අමතරව සෞඛ්‍ය අමාත්‍යාංශයේ හා රාජ්‍ය අමාත්‍යාංශයන්හි නිලධාරීන් පිරිසක් මේ සඳහා එක්ව තිබෙනවා.

 

 

Hits: 11

You might also like
Comments
Loading...